ජාත්‍යන්තර සංගීත චිකිත්සකවරයෙකු වීමට විශාරද උපාධිය ප්‍රමාණවත්ද?

ඔබ පාසල් කාලයේදී සංගීතය විෂයක් ලෙස නොකළ අයෙක්ද? එසේත් නැතිනම් ඔබ සතුව ඇත්තේ භාත්කණ්ඩේ (විශාරද) සංගීත දැනුම පමණක්ද? විදේශීය රටක පිළිගත් සංගීත චිකිත්සකවරයෙකු වීමට නම් ඔබ සපුරාගත යුතු නියම සුදුසුකම් මොනවද කියල විමසීමක් කරන්නයි මේ සූදානම.

බොහෝ ශ්‍රී ලාංකික සිසුන් සංගීත චිකිත්සාව හැදෑරීම සඳහා විදේශගත වීමට උත්සාහ කිරීමේදී මුහුණ දෙන ප්‍රධානතම ගැටලුවක් තිබේ. එනම්, මම විශාරද විභාගය සමත්. ඒක විදේශීය විශ්වවිද්‍යාලයට ඇතුළත් වෙන්න ප්‍රමාණවත්ද? යන්නයි.

සරලව කිවහොත් එයට පිළිතුර 'නැත' යන්නයි. ජාත්‍යන්තර මට්ටමේ සංගීත චිකිත්සකවරයෙකු වීමට නම් ඔබට ABRSM, Trinity, LCM වැනි බටහිර සංගීත විභාග සුදුසුකම් තිබීම අත්‍යවශ්‍ය වේ.

විශාරද උපාධියට වඩා බටහිර සංගීතය හැදෑරීම (Western Music) මෙම වෘත්තියට අනිවාර්ය වීමට බලපාන ප්‍රධාන හේතු පහත දැක්වේ.

එංගලන්තය, ඇමරිකාව, ඕස්ට්‍රේලියාව හෝ කැනඩාව වැනි රටවල සංගීත චිකිත්සක උපාධි පාඨමාලා 100% ක්ම පදනම් වී ඇත්තේ බටහිර සංගීත න්‍යාය පදනම් කර ගනිමිනි.මේ පිලිබඳව ඉගෙනීම මගින් බටහිර සංගීතය තුළ ඇති ස්වර කියවීම (Sight Reading), ස්වර මාලා (Scales), සහ විශේෂයෙන්ම හාමනි (Harmony/Chords) ගැන ගැඹුරු දැනුමක් ලබා දේ. බටහිර විශ්වවිද්‍යාලයක අධ්‍යාපනය ලැබීමට මෙම මූලික දැනුම අත්‍යවශ්‍ය වේ.

විශාරද උපාධිය පදනම් වන්නේ උතුරු ඉන්දීය රාගධාරී සංගීතය මතයි. එහි මූලිකව ඇත්තේ , තනු නිර්මාණය (Melody) ආදියයි. බටහිර චිකිත්සාවේදී අත්‍යවශ්‍ය වන හාමනි (Harmony) හෝ Chords (ස්වර සංයෝජන) භාවිතය එහි නොමැත. එබැවින් එරට පන්ති කාමරය තුළදී විශාරද දැනුම සෘජුවම භාවිතා කිරීම අපහසුය.

ලොව පුරා සංගීත චිකිත්සාවේදී ප්‍රධාන වශයෙන්ම භාවිතා කරන්නේ පියානෝව , කී බෝර්ඩ් සහ ගිටාරය යි.ඊට හේතුව , චිකිත්සාවේදී රෝගියාට ගායනා කිරීමට සහාය වීම සඳහා, එකවර හඬවල් කිහිපයක් (Chords) වාදනය කළ හැකි භාණ්ඩ අවශ්‍ය වීමයි. බටහිර සංගීතය හැදෑරීමේදී (විශේෂයෙන් පියානෝ) හරහා මෙම කුසලතාව කුඩා කල සිටම වර්ධනය කෙරේ.

නමුත් , විශාරද උපාධිය තුළ කෙරෙන ඉගෙනීම් කටයුතු වලදී බොහෝ විට සිතාර්, වයලීන් (කර්ණාටක/හින්දුස්ථානි ක්‍රමයට) හෝ හර්මෝනියම් වැනි භාණ්ඩ සඳහා යොමු වේ. හර්මෝනියම් වැනි භාණ්ඩයක් ජාත්‍යන්තර සංගීත චිකිත්සාවේදී ප්‍රධාන භාණ්ඩයක් ලෙස භාවිතා නොවේ.

ඔබ විදේශීය බටහිර විශ්වවිද්‍යාලයකට අයදුම් කරන විට ඔවුන් අනිවාර්යයෙන්ම Audition එකක් හෙවත් ප්‍රායෝගික පරීක්ෂණයක් පවත්වයි. එහිදී ඔවුන් ඔබෙන් බලාපොරොත්තු වන්නේ,ලබා දෙන බටහිර සංගීත සටහනක් (Staff Notation) බලාගෙන එවලේම වාදනය කිරීමේ හැකියාව සහ Chords භාවිතා කරමින් ගීතයක් ගායනා කිරීමේ හැකියාවයි.

ඔබ සතුව විශාරද උපාධිය පමණක් තිබේ නම්, මෙම බටහිර ස්වර කියවීමේ හැකියාව නොමැති වීම නිසා ඔබට මෙම පරීක්ෂණයෙන් සමත් වීම අසීරු විය හැක.

ඔබේ අරමුණ ජාත්‍යන්තර සංගීත චිකිත්සකවරයෙකු වීම නම්, ඔබ බටහිර සංගීතය ද හැදෑරීම අවශ්‍ය වේ.

එසේනම් 'විශාරද' උපාධියෙන් වැඩක්ම නැද්ද?

ඔබ මූලික සුදුසුකම ලෙස බටහිර සංගීතය පිලිබඳව සුදුසුකම් ලබාගෙන විශ්වවිද්‍යාලයට ගිය පසු, ඔබට අමතර දක්ෂතාවයක් ලෙස විශාරද දැනුම භාවිතා කළ හැක. විශේෂයෙන් ආසියානු රෝගීන් සමඟ වැඩ කිරීමේදී හෝ භාවනා සංගීතය (Relaxation Music) නිර්මාණය කිරීමේදී ඔබේ රාගධාරී දැනුම ඔබට අද්විතීය වටිනාකමක් එකතු කරනු ඇත.

Loading