ඉන්දියාවේ දී සංගීත චිකිත්සක උපාධියක් හැදෑරීමට ඔබට තිබිය යුතු සුදුසුකම් මොනවාද?

බටහිර රටවලට සාපේක්ෂව ඉන්දියාවේ විශ්වවිද්‍යාල ප්‍රවේශ සුදුසුකම් තරමක් නම්‍යශීලී සහ ශ්‍රී ලාංකික සිසුන්ට වඩාත් ගැලපෙන මට්ටමක පවතී. විශේෂයෙන්ම ඔබ සතුව විශාරදන්උපාධිය තිබේ නම්, මෙය ඔබට විවෘත වන හොඳම දොරටුවයි.

ඉන්දියාවේ සංගීත චිකිත්සාව සම්බන්ධයෙන් බහුලවම පවතින්නේ පශ්චාත් උපාධි ඩිප්ලෝමා සහ ශාස්ත්‍රපති උපාධි පාඨමාලාවන්ය. මෙම පාඨමාලා සඳහා ඇතුළත් වීමට අවශ්‍ය මූලික සුදුසුකම් ප්‍රධාන කොටස් තුනක් යටතේ දැක්විය හැක.

1. අධ්‍යාපනික සුදුසුකම් (Academic Qualification)

බොහෝ ඉන්දියානු විශ්වවිද්‍යාල (MGM, Chennai School of Music Therapy) මූලික සුදුසුකම ලෙස ඕනෑම පිළිගත් විශ්වවිද්‍යාලයක උපාධියක් (bachelor’s degree) අපේක්ෂා කරයි.

එසේ නම්,

ඔබ පහත කාණ්ඩවලින් එකකට අයත් විය යුතුය,

A - සංගීතය පිළිබඳ උපාධියක් (B.Mus) තිබීම.

B - මනෝ විද්‍යාව (Psychology) පිළිබඳ උපාධියක් තිබීම.

C - වෛද්‍ය වෘත්තියට අදාළ උපාධියක් (MBBS, ආයුර්වේද, හෝමියෝපති, හෙද, භෞත චිකිත්සක) තිබීම.

D - වෙනත් ඕනෑම ක්ෂේත්‍රයක උපාධියක් (Management, IT, Arts) ඇති නමුත්, විධිමත් සංගීත දැනුමක් ඇති අය.

(එනම්, ඔබට A/L වලින් පසු ලබා ගත් ඕනෑම පිළිගත් උපාධියක් තිබේ නම්, සංගීත සුදුසුකම් මත පදනම්ව ඉල්ලුම් කළ හැක.)

2. සංගීත සුදුසුකම් - විශාරද උපාධිය හිමි ඔබට සුදුසුම තැනයි.

මෙතැනදී බටහිර රටවලට වඩා ඉන්දියාව සම්පූර්ණයෙන්ම වෙනස් වේ. ඔවුන් ඉන්දියානු ශාස්ත්‍රීය සංගීතයට මූලිකත්වය ලබා දේ.

ඔබ භාත්කණ්ඩේ සංගීත විද්‍යාපීඨයේ සංගීත විශාරද හෝ ඊට සමාන පිළිගත් ඉන්දියානු සංගීත විභාගයක් සමත් වී ඇත්නම් එය ප්‍රධාන සුදුසුකමක් ලෙස පිළිගැනේ.

ඔබට බටහිර සංගීතය පිලිබඳව පිළිගත් සහතික තිබේ නම් ඒවා පිලිබඳව ද සලකා බලයි.

විධිමත් සහතික නොමැති වුවද, වසර කිහිපයක පුහුණුව සහ ප්‍රවීණතාවය ඔප්පු කළ හැකි නම් (සම්මුඛ පරීක්ෂණයේදී) ඇතැම් ආයතන නම්‍යශීලී වී ඔබට අවස්ථාව ලබා දීමට කටයුතු කරයි.

3. ප්‍රවේශ පරීක්ෂණය

ඔබට ඉහත සහතික තිබුණද, ආයතනය විසින් පවත්වන ප්‍රායෝගික පරීක්ෂණයෙන් සමත් වීම අනිවාර්ය වේ. එහිදී පරීක්ෂා කරන්නේ:

- ගායන හැකියාව (Voice quality and stability).

- ස්වර හඳුනා ගැනීමේ හැකියාව (Pitch discrimination).

- ඔබේ සංගීතය භාවිතා කරමින් හැඟීම් ප්‍රකාශ කිරීමේ හැකියාව.

- ඉංග්‍රීසි භාෂාව හැසිරවීමේ සාමාන්‍ය දැනුම (English Proficiency).

ශ්‍රී ලාංකික සිසුන්ට ඇති විශේෂ වාසිය

ඔබ කලා අංශයෙන් උසස් පෙළ හදාරා, බාහිර උපාධියක් (BA) කරගෙන සිටින අතරතුර විශාරද විභාගයද සමත් අයෙක් නම්, ඔබට ඉන්දියාවේ සංගීත චිකිත්සක පශ්චාත් උපාධියකට (Master's) පහසුවෙන්ම ඇතුළත් විය හැක.

බටහිර රටවල මෙන් "බටහිර සංගීතය ඉගෙනගෙන නැත්නම් බෑ" යන දැඩි නීතිය ඉන්දියාවේ නැත. ඔවුහු විශාරද සහතිකය ඉතා ඉහළින් පිළිගනිති.

Loading