අප විසින් පවත්වන ලද සතිමත් බව (Mindfulness), හුස්ම ගැනීමේ අභ්‍යාස සහ සංගීත චිකිත්සක (Music Therapy) වැඩසටහන්වලදී බොහෝ දෙනෙකුට අත්විඳීමට ලැබෙන පොදු සිදුවීමක් තිබේ. එනම්, වැඩසටහන අතරතුර නොදැනුවත්වම දෑස් පියවී නින්ද යාමයි.

මෙය බොහෝ විට සහභාගී වන්නන් තුළ යම් ලැජ්ජාවක් හෝ ගැටලුවක් ඇති කිරීමට හේතු විය හැක. මට වැඩසටහන එපා වුනාද?, මම අලස වුනාද? වැනි සිතුවිලි ඔබටත් ඇති වූවා විය හැක.

නමුත් විද්‍යාත්මක සත්‍යය නම්, එය වැඩසටහන අසාර්ථක වීමක් නොව, එය ඔබ ගැඹුරු මානසික සුවයක් ලැබූ බවට ලැබෙන හොඳම සහතිකයයි. ඒ ඇයිද යන්න විද්‍යාත්මකව විමසා බලමු.

1. මොළයේ තරංගවල වෙනස්වීම (Brainwaves & Deep Relaxation)

අප සාමාන්‍යයෙන් කතා බහ කරමින්, වැඩ කරමින් අවධියෙන් සිටින විට මොළය ක්‍රියාත්මක වන්නේ වේගවත් බීටා (Beta) තරංග මට්ටමේය.

නමුත් අපගේ වැඩසටහනේදී භාවිතා කරන සුවිශේෂී සංගීත රිද්මයන් සහ මඟ පෙන්වන භාවනා ක්‍රම (Guided Meditation) මගින් ඔබේ මොළය ඉතා ඉක්මනින් සන්සුන් ඇල්ෆා (Alpha) සහ තීටා (Theta) තරංග මට්ටම් වෙත රැගෙන යයි.

සාමාන්‍යයෙන් අපගේ මොළය මෙම තීටා මට්ටමට පිවිසෙන්නේ අප රාත්‍රියේ නින්දට යන විටයි. එම නිසා, වැඩසටහන අතරතුර ඔබේ සිත සන්සුන් වූ විට, මොළය එය නින්ද ලෙස වරදවා වටහාගෙන ඔබට නින්දක් ගෙන එයි. මෙය අලසකමක් නොව, ඔබේ මනස සාර්ථකව සන්සුන් වූ බවට ලැබෙන සාක්ෂියකි.

2. ආතති හෝමෝන ඉවත්වීම සහ ආරක්ෂාව දැනීම.

අපගේ හුස්ම ගැනීමේ අභ්‍යාස (Breathing Exercises) මගින් ශරීරයේ ඇති ආතති හෝමෝනය වන කෝටිසෝල් (Cortisol) මට්ටම පහත හෙළයි. එවිට ඔබේ ස්නායු පද්ධතිය Parasympathetic Mode හෙවත් විවේක ගැනීමේ මාදිලියට මාරු වේ.

මෙවිට ශරීරයට දැඩි සැහැල්ලුවක් සහ ආරක්ෂිත හැඟීමක් දැනේ. වසර ගණනාවක් තිස්සේ නොලැබුණු විවේකයක් ශරීරයට දැනුණු විට, එය ස්වභාවිකවම නිද්‍රා තත්වයට පත් වේ.

3. එය අලසකමක් නොවන්නේ ඇයි?

අලසකම සහ ගැඹුරු විවේකය යනු දෙකකි.

ඔබට වැඩසටහන එපා වී අලස වූවා නම්, ඔබ නොසන්සුන් වනු ඇත , වටපිට බලනු ඇත, හෝ සිත වෙනත් දේවලට යොමු වනු ඇත.

ඔබට නින්ද ගියේ නම්, එයින් අදහස් වන්නේ ඔබ අප ලබා දුන් උපදෙස් සහ සංගීතය ඉතා හොඳින් ග්‍රහණය කර ගත් බවත්, ඒ හරහා ඔබේ විඩාව පත් ශරීරය එයට අවශ්‍ය විවේකය ලබා ගත් බවත්ය.

එම නිසා, අපගේ වැඩසටහනක් අතරතුර ඔබට නින්ද ගියේ නම් ඒ ගැන පසුතැවෙන්න එපා. එයින් අදහස් වන්නේ ඔබේ මනසට සහ ශරීරයට අත්‍යවශ්‍ය වූ සුවපත් වීම එම මොහොතේ සිදුවූ බවයි.

ඔබේ මනස සුවපත් කිරීමට සහ සැහැල්ලුව අත්විඳීමට අපගේ මීළඟ වැඩසටහන සමඟින් එක්වන්න.

Loading